Versindaba
~ 'n Weblog vir die Afrikaanse digkuns ~

noord-namibië

duisende klippe lê rondom ons

soos nuuskierige oë

kafferbrak  sê pa deur sy baard

as ons verby ’n padstal ry

die geribde dier vreet aan ’n droë akkedis

ovambo’s kyk grootoog na ons bakkie

’n seuntjie draf angstig nader om ons uit te nooi

pa kyk stip voor hom

  pa  vra ek

       ja

die stal verdwyn agter ons

en die klippe lê tot teen die lug

eendag sal als woestyn wees

en die bakkie die brak die ovambo’s ons

sal toegewaai onder die sand lê

  het pa ooit iemand op die grens

 nee

sy vingers trek styf om die stuur

hy kyk stip voor hom   

en ons bakkie skuurpapier die landskap vol stof

die stilte groei tussen ons soos ’n gedig

(Uit: Versindaba 2010, Protea Boekhuis, 2010)

© Pieter Odendaal

16 Desember 2009

op pad see toe

het mdantsane se pondokke

soos alles tevore ongesiens

verby die vensters

van ons double-cab geskiet

sus was karsiek en ooms op rsg

het oor geloftedag gestry

iewers was ’n ongeluk daar voor

’n taxi omgekeer op die teer

ons moes wag

iemand het langs die pad gelê

’n navy kombers om haar lyf

haar arms oop asof sy die gras

en die grond ten laaste terugeis

sus het bleek

en opgekrul

op die agterbank gelê

sy wou weet of ons al

die see kon sien

©  Pieter Odendaal. Okt. 2010