Versindaba
~ 'n Weblog vir die Afrikaanse digkuns ~

Bruilof

Kalkoentjie trippel dwarslyf deur die wingerdbos,

trap alsó-alsó … trap die druiwetrosse mos –

dans die dans van wynlose Kana totdat Iemand

die klipkanwater van virusse verlos.

© Pirow Bekker, 2021

Gedig onder covid

‘n Jongwynkwatryn moet sewe jaar se kelder hê

volgens ‘n fynproewer wat hom verkeer wil ontsê,

maar vergeet dat wyshede dwaal uit Dionusiese feeste

en geheime verklap wat die boeket onderlê.

© Pirow Bekker, 2021

Wynlandidille

‘n Digterlike wa in die wingerd, ‘n vierperdewa –

hoeveel meer kan ‘n boer op so ‘n goeie môre nou vra?

Sy naam is “kwatryn”: van quattuor – vier rigtings waarin

vanuit die vrag vreugde kan sprei oor perke en plae.

© Pirow Bekker, 2021

Kelkiewynkwatryn

Sy ark raak daagliks duwwer onder strenge kwarantyn,

laat hierdie Noag vlugte waag teen covidkoors en pyn:

Hy stuur sy waterdraerpatryse uit, die wingerdwêreld oor

en wat hul vir die heildronk bring, is pure engelwyn.

© Pirow Bekker, 2021