Posts Tagged ‘Poetry International Rotterdam’

Jong Belarusiese digter veroorsaak beroering

Friday, July 31st, 2009
Valzhyna Mort

Valzhyna Mort

Dit is seker gepas dat ’n letterkunde opgewonde sal raak oor haar jong(er) talent en dit sal koester ten einde volle wasdom oor ’n aantal jare te kan bereik. Maar wie is hierdie ontluikende stemme op die verhoog van die wêreldpoësie? Een so ’n kandidaat is beslis die 28-jarige Belarusiese digter Valzhyna Mort wat nog verlede maand met groot sukses aan die Rotterdamse Poetry International deelgeneem het. Mort het in 2005 gedebuteer met I’m as Thin as Your Eyelashes. Hiervoor het sy Slowenië se Crystal of Vilencia Award in 2005 ontvang en die Duitse Burda Poësie-prys in 2008. Van haar verse is ook opgeneem in die gesaghebbende bloemlesing New European Poets wat verlede jaar by Graywolf Press verskyn het.

Op die oomblik trek sy egter baie aandag met haar tweede digbundel, Factory of tears, wat einde verlede jaar in die VSA verskyn het waar sy sedert 2006 woon en as skrywer-in-residensie by die Universiteit van Baltimore betrokke is. (Vantevore was sy in soortgelyke poste by die Literarisches Colloquium en die Sylt-Quelle in Duitsland.) Die verse in Factory of tears is deur Mort in samewerking met die Pulitzer-wenners Elizabeth Oehlkers en Franz Wright na Engels vertaal.

Volgens Svetlana Tomić se resensie van die bundel in die nuutste uitgawe van World Literature Today word Mort se poësie gekenmerk deur “an obstinate resistance and rebellion against the devaluation of life, which forces her to multiply intelligent questions, impressive thoughts, and alluring metaphors, while her rhythm surprisingly arises as a powerful tool for the most dramatic moments of her verses.” (WLT, May-June, p.71) Of soos Poetry International dit hier op hul webblad stel: “The musical litanies of the poems’ phrases mesmerise the reader, but sudden moments of discord remind us that Mort’s world is not entirely harmonious.” Mort se verse, wat ek wel te lese kon kry, is inderdaad indrukwekkend. ’n Mens kan nie anders as om met Tomić saam te stem dat Valzhyna Mort beslis een van die mees belowende jonger digters vandag in die wêreldpoësie is nie.

Ter illustrasie, haar gedig Belarusian I hieronder. Maak seker dat jy ook haar gedig Grandmother lees wat op Poetry International se webblad geplaas is.

Lekker lees en geniet die naweek. Nuuswekker hervat weer Maandag.

Mooi bly.

LE

 

BELARUSIAN I

even our mothers have no idea how we were born
how we parted their legs and crawled out into the world
the way you crawl from the ruins after a bombing
we couldn’t tell which of us was a girl or a boy
we gorged on dirt thinking it was bread
and our future
a gymnast on a thin thread of the horizon
was performing there
at the highest pitch
bitch

we grew up in a country where
first your door is stroked with chalk
then at dark a chariot arrives
and no one sees you anymore
but riding in those cars were neither
armed men nor
a wanderer with a scythe
this is how love loved to visit us
and snatch us veiled

completely free only in public toilets
where for a little change nobody cared what we were doing
we fought the summer heat the winter snow
when we discovered we ourselves were the language
and our tongues were removed we started talking with our eyes
when our eyes were poked out we talked with our hands
when our hands were cut off we conversed with our toes
when we were shot in the legs we nodded our head for yes
and shook our heads for no and when they ate our heads alive
we crawled back into the bellies of our sleeping mothers
as if into bomb shelters
to be born again
and there on the horizon the gymnast of our future
was leaping through the fiery hoop
of the sun

Poetry International ’n groot sukses

Wednesday, June 24th, 2009
Die fees der feeste

Die fees der feeste

De Volkskrant se Peter Swamborn berig dat die pasafgelope Poetry International te Rotterdam ‘n groot sukses was. Dit was naamlik die 40ste jaar waarin dié weeklange poësie-fees plaasgevind het en vanjaar is dit deur 5,500 besoekers bygewoon; aansienlik meer as verlede jaar se 3,400. Nog ‘n belangrike feit is dat geen toegangsgelde gevra word nie; besoekers lewer naamlik ‘n bydrae na gelang van wat ‘n bepaalde item vir hulle werd was. Op dié manier is daar vanjaar 7,850 euro ingevorder. Volgens die beriggewer was ‘n interessante toevoeging vanjaar die 70 studente van die Arnhemse Toneelskool wat gedigte vooraf gememoriseer het en dit dan in die oor van omstanders gefluister het. (Sjoe, wat ‘n briljante idee!) Nietemin, die hooffokus vanjaar was op die 75-jarige Rutger Kopland en sy gedigte wat deur digters uit Swede, Pole, Hongarye, Rusland, Frankryk, China en Australië voorgelees is in hul onderskeie tale. Ook die items wat gerig was op WH Auden en Jan Eijkelboom, het heelwat belangstelling uitgelok; eersgenoemde vanweë die nuwe vertaling wat in Nederland beskikbaar is en laasgenoemde vanweë sy afsterwe verlede jaar. Volgens die organiseerders was die bywoning van die minder bekende oorsese digters egter teleurstellend. ‘n Verdere klagte was gemik teen die parallellopende program wat gemaak het dat die besoekers nie ál die items kon bywoon nie. (De Volkskrant se volledige berig kan hier gelees word.)

Ter afsluiting wil ons jou aandag vestig op Jy het my as drenkeling herken, dr. Hans Ester se briljante artikel oor die korrespondensie tussen Elisabeth Eybers en Chris van Geel. Ook op die woelige gesprek wat onder aan Lucas Malan se artikel Die bruikleen-fenomeen oor intertekstualiteit ontstaan het.

En mag iemand vandag ‘n gedig in jóú oor fluister …

Mooi bly.

LE

Dinsdag, 12 Mei 2009

Tuesday, May 12th, 2009

'n Geskrop in die hoenderhokDie 40ste Rotterdamse Internasionale Poësiefees, wat steeds een van die grootste en mees gesogte feeste ter wêreld is,  word vanjaar van 13 tot 19 Junie aangebied. In die verlede het vele Afrikaanse digters al die geleentheid gehad om aan hierdie besonderse fees deel te neem, maar vanjaar is ons enigste verteenwoordiging op die program ons immergroen troebadoerdigter – Gert Vlok Nel. Voorspoed, Gert, ons is saam met jou verheug oor dié uitsonderlike prestasie! Van die vernaamste ander digters op die lys van uitverkorenes is: Jacques Roubaud (Frankryk), Bei Dao (China), Gerrit Kouwenaar (Nederland), Matthew Sweeney (Ierland) en Valzhyna Mort (Rusland). Gaan kyk gerus by http://2009.poetry.nl/ vir meer inligting oor dié Olimpiese Spele van die digkuns.

Dit wil egter ook voorkom asof die organiseerders tans met ’n netelige probleem te make het – verskeie Nederlandse digters, waaronder Rien Vroegindeweij en Jules Deelder het naamlik van die fees onttrek, aangesien net 5 minute voorleestyd aan bepaalde Nederlandse digters toegeken is. Dit is blykbaar die tyd wat aan debutante toegeken word en hulle redeneer dat dit onaanvaarbaar is dat langer voorleestyd aan buitelandse digters toegeken word terwyl hulle as “debutante” gereken word. Rien Vroegindeweij suggereer in sy brief dat die “Rotterdamse-aand”, waartydens hy en ander Nederlandse digters sou optree, in wese gaan “om gemeentesubsidie veilig te stellen”. (Die volledige brief is te lees by “Reuring rond Rotterdamse Avond PIR?”)

Ai, lyk my die probleme wat ons tans ondervind met die finalisering van ons eie fees einde November is maar ’n vulletjie in vergeleke hiermee …

Mag jou eie “glorietye” hierdie week veelvuldig en grensloos wees. Kuier lekker rond op die webblad (ons webmeester vertel dat daar sommer ’n hele aantal besonderse items binne enkele dae bygevoeg gaan word!) en raak opgewonde oor die digkuns.

Mooi bly.

LE

 

  •