Versindaba
~ 'n Weblog vir die Afrikaanse digkuns ~

onder die berg en die oggendlug

lê ‘n wingerd blarerig en sug

agter glas roep my hart na ‘n dag

sonder pes en pandemie-berig

 © René Bohnen, 2021

hier is ‘n vers in my taal op ‘n bottel

hier is wyn, skaaptjops en ‘n braaiskottel

maar ek sit sonder jou en jy sonder my want

‘n virus het ons wêreld kom betottel

 © René Bohnen, 2021

my gedigte my wyntjie en ek

sit al ‘n jaar op hierdie een plek

gegrendel gebottel gestrand met

covid wat aan ons longe lek-lek

© René Bohnen, 2021

ons weet mos nou al ons dae is soos gras

op die skaakbord staan ‘n bestemde uurglas

langs my selfoon, beursie, ‘n masker en my

doepa teen die virus, my rooiwyn paljas

 © René Bohnen, 2021