Posts Tagged ‘Salomé van Vuuren gedig’

Salomé van Vuuren. Ars poetica

Friday, December 10th, 2021

 

Ars poetica

 

diep in die siel

is die lêplek

van woorde

wat sluimerwag

vir die oerknal

wanneer papirus en ink

ontmoet

‘n verskietende ster blink

in ʼn ligbaan

verse wat klink

 

© Salomé van Vuuren, 2021

 

Salomé van Vuuren. Brief

Friday, December 10th, 2021

 

Brief

 

liewe lyf

 

dis jy wat die verraaier is

sonder nadenke

jou oorgee aan sinlike genot

reageer op streling, aanraking

dit alles

terwyl ek steeds afwesig is

ons is tog een van rede

en van sin

daarom móét jy jouself bedwing

wees getrou liewe troulose

jy weet tog waar ek hoort

teen die tyd besef jy mos

soort soek soort

 

groete

jou hart

 

© Salomé van Vuuren, 2021

 

 

Salomé van Vuuren. Besoek aan Matjiesfontein

Friday, December 10th, 2021

 

Besoek aan Matjiesfontein

 

vroegaand

vind Johnny se vingers

hulle pad

na die swart

op die klavier

 

die karoostilte breek oop

in helder klanke –

in sy stem lê

trots, waardigheid

vrede?

 

loom gaste loop

nuuskierig nader

word vreemde bekendes

deur melodieë

 

ja, johnny- bly speel

jy is mos toergids

 

ʼn ster in die

klein

hart en siel

van matjiesfontein

 

© Salomé van Vuuren, 2021