Posts Tagged ‘Stellenbosch Literary Project’

Nuwe webtuiste vir Suid-Afrikaanse lettere

Wednesday, March 23rd, 2011
Die Stellenbosch Literary Project

Die Stellenbosch Literary Project

Einde verlede week is SliP, of te wel Stellenbosch Literary Project, amptelik op die internet gevestig en die eerste aanduidings is reeds dat hierdie ‘n besonderse webblad gaan wees wat ‘n belangrike bydrae gaan lewer tot die breë Suid-Afrikaanse letterkunde. Die projekleier is Leon de Kock en rondom hom het hy ‘n gedugte span redaksionele medewerkers byeen gebring, bestaande uit: Pieter Odendaal (webmeester),  Hale Tsehlana, Annél Pieterse en Riaan Oppelt.

Volgens die aankondiging op die hoofblad is SliP se oogmerk soos volg: “As our acronym suggests, our aim is to slip sideways into the online literary reporting game. We are not here to be all things to all people, or to cover every possible literary-cultural topic. However, if there is something amiss in the literary world, and the slip is showing, we will not blanch at the idea of highlighting it! We’ll go big on big issues, but we won’t try to spread ourselves so wide that you can’t see where we began and where we might end, either.”

Onder die bloggers wat tot die webblad gaan bydrae, is daar bekende name soos Finuala Dowling, Corina van der Spoel, Sarah Nuttall, JC Blyk (beter bekend as Johannes van Jerusalem), Khanyisile Mbongwa en Stellenbosse akademikus Daniel Roux. Van almal is daar reeds plasings wat gelees kan word.

Finuala Dowling

Finuala Dowling

Nog ‘n opwindende projek is die Poësie-leerskool wat deur Finuala Dowling bedryf gaan word. Hiervolgens plaas sy ‘n bepaalde opdrag aan die hand van ‘n gekose vers op die webblad vir aspirant digters. Die idee is dan dat daar gesprek gevoer word oor die aspekte wat deur Finuala uitgelig word. Vir haar eerste projek het sy Frank O’Hara se gedig “Lana Turner has collapsed” gekies.

Besoek gerus dié nuwe toevoeging tot ons literêre kuberlandskap en vergewis jou van wat op die groter verhoog van ons letterkunde aan die gebeur is.

Vir jou leesplesier volg Finuala Dowling se projekgedig onder aan die Nuuswekker.

***

Vanoggend is daar sommer heelwat nuwe inhoud om aan te kondig: Zandra Bezuidenhout se omvattende resensie van Breyten Breytenbach se bundel, die beginsel van stof, is geplaas; Philip de Vos besin op sy kenmerkende manier oor die toedrag van 60 jaar later, terwyl die amptelike notule van die skrywersvergadering wat op 12 Maart plaasgevind het, ook vir kennisname en bespreking geplaas is. Hoe voel JY oor die aangeleenthede wat daar bepraat is?

Ten slotte fokus ek jou aandag op ‘n hele aantal vertalings deur Peter Louw wat ontvang en in die vertaalkamers geplaas is. Volg gerus die blikvanger se skakels op die hoofblad om betrokke vertalings te lees.

En daarmee eers weer groete. Geniet dié middel-van-die-week dag.

Mooi bly.

LE

 

Lana Turner has collapsed

 

Lana Turner has collapsed!

I was trotting along and suddenly

it started raining and snowing

and you said it was hailing

but hailing hits you on the head

hard so it was really snowing and

raining and I was in such a hurry

to meet you but the traffic

was acting exactly like the sky

and suddenly I see a headline

LANA TURNER HAS COLLAPSED!

there is no snow in Hollywood

there is no rain in California

I have been to lots of parties

and acted perfectly disgraceful

but I never actually collapsed

oh Lana Turner we love you get up

 

© Frank O’Hara

 

 

Pieter Odendaal. Kom glip in by SLiP

Thursday, March 10th, 2011
Die Stellenbosch Literary Project

Die Stellenbosch Literary Project

Tam-tararam-tam-tam-tam-tam! (lees: die tekstuele ekwivalent van pyrotechnics, sternum-vibrerende klankeffekte en juigende joliges.) As jy dit nog nie weet nie, SLiP is op pad. Dis nou die Stellenbosch Literary Project, ‘n inisiatief geloods deur Prof. Leon de Kock van die US se Engels Departement wat ten doel het om ‘n virtuele platform te skep vir Suid-Afrikaanse letterkunde in al haar gedaantes en tonge. Oor 7 dae gaan ons webwerf, www.slipnet.co.za, live gaan.

Twee maande gelede stuur ek ‘n e-pos aan die man wat Triomf vertaal het nadat ek ‘n voëltjie hoor fluit het dat hy ‘n projek vir die bevordering van ‘n meertalige literêre dialoog wil loods en ‘n side-kick nodig het.  Aanvanklik was Leon de Kock redelik deurmekaar gewees oor hierdie mannetjie wat pro-letterkunde is en terselfdertyd sy taalstudies vir biologie versaak het. Maar ons het dadelik gekliek en staan nou op die vooraand van iets wat ek dink bitter groot gaan wees. Tans bestaan ons bestuurspan uit Hale Tsehlane, Riaan Oppelt, Annel Pieterse, Prof. Leon de Kock en ek. Hale is ‘n digter in eie reg, Riaan verorber films en musiek en Annel is besig met haar doktorale proefskrif oor podiumpoësie. Leon de Kock het geen bekendstelling nodig nie: As digter, vertaler, akademikus en romansier (ja, sy eerste roman, Bad Sex, verskyn later die jaar) het hy die Suid-Afrikaanse literêre landskap al platgery met sy 4×4-verstand.

So, wat is SLiP se storie? Op ons tydelike tuisblad stel Leon de Kock dit as volg:

Our aim is to slip in some quality attention on major issues, important and emergent writers, and significant new publications in the field of South African writing – in all languages, and across all lines. The slipway tracks embedded in our logo signify crossings and intersections of any and all kinds. We reject all exclusivist agendas and partisan solidarities apart from a commitment to the project of literary writing.

Ons volledige “missie en visie” (ek haat hierdie term – dit laat my dink aan besighede en mense met lang, geldgierige vingers) kan op www.slipnet.co.za gelees word. Ons gaan ook verskeie  bloggers hê wat hul sê gaan sê:

  • Finuala Dowling – befaamde digter wat ook die Poetry Project (ons aanlyn-skryfskool) gaan orkestreer
  • Professor Sarah Nuttall – skrywer en akademikus
  • JC Blyk (beter bekend as Johannes van Jerusalem) – digter en mistikus
  • Khanyisile Mbongwa – uitvoerende kunstenaar en aktivis wat onder andere een van die stigterslede van die Gugulective is en bekend is vir haar video-gedigte
  • Corina van der Spoel – boekhandelaar en events-koördineerder
  • Dr. Daniel Roux – ‘n gerekende literêre kritikus wat oor die wel en weë van literêre teorie op sy blog “Theory Bytes” gaan berig
  • Jacob Dlamini – historikus en skrywer van Native Nostalgia

As jy nie reeds jou lippe aflek nie, sal die volgende inligting jou honger woordmaag behoorlik laat grom: SLiP wil ook ‘n aanlyn resensie-argief daarstel waar alle resensies (of dit nou op dooie bome of virtueel verskyn) van alle nuutverskene Suid-Afrikaanse literêre werke beskikbaar sal wees. Hiermee nooi ons dan ook resensente uit om resensies vir SLiP te skryf (stuur ‘n e-pos aan info@slipnet.co.za indien jy sou belangstel). Op die oomblik sukkel ons nog om voldoende fondse in die hande te kry, sodat ons ons resensente slegs met die betrokke geresenseerde boek en harte wat warm van dankbaarheid klop kan vergoed, maar sodra ons genoeg oë op ons blad kry, kan ons begin om hulle te betaal.

Buiten vir die webwerf gaan SLiP ook maandelikse poësiegeleenthede by Amazink in Kayamandi onder die titel “InZync” aanbied. Ons eerste aand is op die 1ste April en die volgende digters gaan optree: Finuala Dowling, Ingrid de Kok, Mbali Vilakazi en Primrose Mrwebi. Hulle sal opgevolg word deur ‘n string jong, bloeiende digters vanuit die Stellenbosch-area en enigiemand is welkom om aan hierdie oop mikrofoon-sessie deel te neem.

Meer inligting sal binnekort op ons webtuiste verskyn; hou intussen ons Facebook-profiel dop by http://www.facebook.com/SLiP.Group

*

Dankie aan Leon en Marlise wat goedwilliglik ingestem het dat ek ‘n bloginskrywing aan SLiP kon afstaan. Ten spyte van ons taal- en kulturele verskille, worstel alle skrywers in ons land met soortgelyke kwessies en daarom is dit lewensbelangrik om platforms te skep waar ons daaraan herinner kan word dat ons om dieselfde laatnagvuur sit om stories vir mekaar vertel.

  •