Iets meer oor Versindaba 2009

PERSVERKLARING: VERSINDABA 2009

 

Versindaba '09 program
Versindaba ’09
Die vyfde Versindaba vind vanjaar op 27 en 28 November plaas by die Oude Libertas Amfiteater op Stellenbosch en dit beloof om selfs nóg meer omvattend en luisterryk te wees as in die verlede. So is daar nie minder nie as 17 digters betrokke by die fees; almal digters van wie daar onlangs nuwe bundels verskyn het, of wie se bundels binnekort op die rakke sal wees nie. Die digters ter sprake (in alfabetiese volgorde) is: Pirow Bekker, Breyten Breytenbach, Johann de Lange, Gilbert Gibson, Joan Hambidge, Daniel Hugo, Antjie Krog, Danie Marais, Loftus Marais, Lucie Möller, Charl-Pierre Naudé, Johannes Prins, Carina Stander, Piet van Rooyen, Jasper van Zyl, Cas Vos en Jelleke Wierenga. Ongelukkig sal Breyten Breytenbach en Gilbert Gibson nie persoonlik teenwoordig kan wees nie; hulle verse sal onderskeidelik deur Stian Bam en Petrus du Preez voorgedra word.
Waar die Versindaba verlede jaar op die poësie as liriek gefokus het, verskuif die fokus vanjaar na die naasbestaan van poësie en die visuele kunste. Ter ondersteuning hiervan sal daar gelyklopend tot die fees ʼn kunsuitstalling in die Oude Libertas Ouditorium te sien wees met kunswerke deur digters wat ook skilder. Digters wie se werke uitgestal gaan word, is: Andries Bezuidenhout, Breyten Breytenbach, Christine Barkhuizen le Roux, Sheila Cussons, Heilna du Plooy, Marlise Joubert, Charl-Pierre Naudé, Rosa Smit, Carina Stander en Ilse van Staden. Die kurator vir dié uitstalling is Johan Myburg. Hierdie besonderse uitstalling open amptelik op Vrydag, 27 November, om 17:00. 

 

 

Items wat die wisselwerking tussen poësie en die visuele kunste verder belig, is die paneelbespreking Met woord & kwas, waaraan Johan Myburg, Carina Stander en Charl-Pierre Naudé onder voorsitterskap van Ampie Coetzee deelneem, asook Philip de Vos en Tertia Visser-Downie se uitvoering van Modest Moessorgski se Prente by ʼn uitstalling, en die spesiale voordragprogram Geskilderde woorde deur die bekende woordkunstenaars Nic de Jager en Antoinette Kellerman.

ʼn Besonderse hoogtepunt tydens die fees gaan Antjie Krog se deelname wees. Saam met haar aanbieding is daar twee musiek-uitvoerings van toonsettings van haar gedigte deur Niel van der Watt, naamlik Die Lady Anne Liedboek, met Renette Bouwer as solis en Elna van der Merwe as begeleier, en die uitvoering van sewe koorstukke deur die Scola Cantorum Kamerkoor onder leiding van Rudolf de Beer. Nog musiekitems wat die aandag gaan trek, is beslis David Kramer se optrede waarmee die Versindaba afskop, asook Laurinda Hofmeyr se toonsettings van gedigte deur Breyten Breytenbach se gedigte waarmee die fees weer afsluit. Om nie eens van Luna Paige se uitvoering van Sappho-gedigte wat deur haar getoonset is, te praat nie …

Vir die poësieliefhebber met ʼn voorkeur aan meer intellektuele pitkos, is daar paneelbesprekings, onderhoude en lesings by die program ingesluit. Die Dana Mouton-gedenklesing, wat elke jaar ʼn hoogtepunt vorm, word vanjaar deur Diana Ferrus gelewer. Ander sprekers is Willem Fransman wat Peter Snyders se werk in oënskou neem, Joan Hambidge wat bestek neem van die sogenaamde Tagtigers en hul bydrae tot ons digkuns, asook Antjie Krog wat vertel van hoe sy tot die digkuns “ontnugter” is. Twee paneelbesprekings wat die belangstelling behoort te wek, is dié oor kinderverse, met ʼn spesiale program deur leerders van Somerset College, asook ʼn bespreking van die bruin stem in ons digkuns onder voorsitterskap van Steward van Wyk.

Inderdaad, ʼn program oor opgewonde te raak.

Die volledige program, gepaardgaande met alle ander toepaslike inligting, kan op die Versindaba-webblad by https://versindaba.co.za gelees word.

Kaartjies kan by Computicket aangekoop word. So ook by Oude Libertas (021) 809 7374 of Protea Boekwinkel op Stellenbosch. Skakel (021) 882 9100 vir meer besonderhede of stuur ʼn e-pos na ls.protea@mweb.co.za.

 

Louis Esterhuizen & Marlise Joubert

Aanhitsers: Versindaba 2009

 

 

 Lees gerus ook Melt Myburgh se Heupvuurvrae op LitNet

 aan Louis Esterhuizen oor hierdie komende fees!

 

 

Oude Libertas Amfiteater Stellenbosch
Oude Libertas Amfiteater Stellenbosch