Desembergedig
kapitulasie
die kobrasleep van die laaste maand
se eerste dae, seil in die gruissand
bult-af tussen droë stoppelbaard
van rooigras en skerp driepunt duwwels
hy kom lê dreigend en lispel op my stoep
so verskans hy homself, die adder,
om met die gelui van klokke
en gemmerbroodmanne saam te smelt
hoewel ek weet dat hy habitueel,
in die halfdonker tussen die droë wit klippies
by die holte onder die blombak wag; –
maar weet hý ook
dat ek in ‘n bewolkte oomblik
onverwags op hom gaan trap
as voorsorg vir my veg of vlug
kapituleer ek liefs vroegtydig, die jaar
begeef myself in ‘n boek of komedie
net om kort-kort deur die blindings te loer
en water vir die malvas
deur die venster te voer
© Anne-Marie Bartie, 2025