Desembergedig
Die hond in Desember
Die dag begin.
Die hond buk toe-oë oor sy bak,
asof hy bid voor hy eet.
Hy volg die oggendson,
jaag geelvinke en akkedisse,
loop om die swembad,
getrou langs die Kreepy se sirkelpad.
Hy speel op sy eie met ‘n tak en tennisbal,
bring ‘n dooie duif
en los dit by die agterdeur.
Hy is heeldag buite
en kom teen skemer nader,
slaap alleen
teen die geslote motorhuisdeur.
Stil doof die lig.
© Jacques Boshoff, 2025