Knikkerspel
Toe jy kind was, was die wêreld gaaf en rond
soos ’n albaster wat jy kon troetel in jou hand.
Eers later sou jy weet hoe hoog jy moet vlieg
om die geheel te begryp voor jy gewindswael
oor die verste omstreke kon sirkel op soek na
uitkoms in die harder kolking van plig en sorg.
Nousedae snap jy egter hoe solied dit alles is,
hoe verspikkel die staalghoen geknikker word
deur die kring van jou oog
wat vroeër helder was, en skoon.
© Louis Esterhuizen, 2026