Vissers van Woorde
Willem de Swyger
Vissers van Woorde is Willem de Swyger se debuutbundel, hoewel hy nie ‘n onbekende in die literêre bedryf is nie. Vissers van woorde bevat 60 gedigte en handel oor verskeie temas soos geloof, verlies, waardering vir sy ma, die liefde vir sy taal, Afrikaans en vele meer. Dié digbundel was vanjaar deel van die Woordfees op Stellenbosch as produksie, getiteld Onder woorde, met onder meer radio-omroepers Frieda van den Heever en Nic de Jager asook Glaskas-sanger, Deon Meiring.
Oor die outeur
Willem de Swyger is ’n voltydse regsgeleerde en ’n deeltydse sanger-liedjieskrywer wat saam met sy gesin in die Eikestad woon.
Hy was veertien jaar oud toe Koos du Plessis se musiek hom die eerste keer gevind en aangespreek het. “Koos se musiek was soos ’n helder lig wat vir my aangegaan het” sê Willem, “Daardie dag is ’n vlammetjie in my aangesteek wat sedertdien steeds brand.”
Met verloop van tyd het die woorde van Kerkorrel, Van Wyk Louw, Coenie de Villiers, Koos Kombuis en Lucas Maree hom ook gewys wat moontlik is in Afrikaans en ander skrywers soos Dylan, Cohen, Springsteen en Kristofferson het hom later verder geïnspireer.
[Minimal Press 2022. Formaat: Sagteband, 139 mm x 221 mm. 83 Bladsye.Prys: R280. ISBN: 978-1-77460-345-5]