Susan Sontag (1933 – 2004)
Siekte was altyd daar:
jou vader sterf aan tuberkulose
en hierna sou jy polifonies
oor siekte-in-al-sy-gedaantes skryf:
siekte as metafoor,
oorlog as kanker,
jou moeder se longkanker;
jy gediagnoseer met leukemie.
I, etcetera sou mens kon skryf
oor jou onvermoeide analise
van ander se pyn of dalk
‘n soort Death Kit?
Dramatiese ironie toe jy uitgestal
word deur Annie Leibovitz,
‘n vulkaniese geliefde, in foto’s
wat jou siekte uitblaker.
Die private word openbaar
soos afdrukke wat ‘n siel steel.
Jou lewensloop bewys:
besinning spruit uit ónmag.
© Joan Hambidge, 2023