Living the ultimate carnivore lifestyle: A South African guide & cookbook. Hendrik Marais. Penguin Books, 2026.
Die agterbladteks adverteer Hendrik Marais se Living the ultimate carnivore lifestyle soos volg:
It’s time to ignore the noise and start listening to your body … to discover what works best for you.”
Die skrywer, Hendrik Marais, het bekendheid verwerf vir sy boeke oor die Ketogeniese leefstyl waarin hy sy eie ervaring met gewigverlies deel. Sedertdien het dit een van sy belangrikste projekte geword om ook ander te motiveer om gewig te verloor deur ʼn gesonde leefstyl te handhaaf deur die vestiging van eenvoudige dog effektiewe eetgewoontes.
Living the ultimate carnivore lifestyle is ʼn keurige, kleurryke resepteboek met aantreklike kleurfoto’s by elke dis. Die boek is op swaar, duursame papier gedruk wat beteken dat dit heelwat jare in die kombuis sal kan oorleef.
Tog is hierdie nie maar nóg ʼn mooi resepteboek nie. Die konsep van die karnivoriese dieet word onderlê deur deeglike, wetenskaplike navorsing wat die skrywer in die inleidende deel van die boek uiteensit. Hy stel dit duidelik dat die boek nie voorskriftelik te werk gaan of op die beginsel van skuldig-voel-as-jy-oortree gebaseer is nie. Die karnivoriese dieet is nie ʼn streng dieet nie, maar verskaf riglyne wat gevolg kan word na gelang van individuele voorkeure of behoeftes.
In Deel 1 word die fundamentele beginsels van die dieet (as ʼn aspek van die ketogeniese dieet) deeglik en wetenskaplik uiteengesit en word die voordele van dié leefstyl bespreek. Daar bestaan verskeie variante van die dieet, onder andere die “leeudieet”, streng karnivoriese dieet, ontspanne (relaxed) karnivoriese dieet en verskeie diëte wat klein hoeveelhede van sekere koolhidrate en plante toelaat. Hoe ʼn karnivoriese dieet in die praktyk werk en hoe mens dit by jou gewone leefstyl in die praktyk kan integreer, word uitvoerig bespreek, en ʼn sinvolle 4-faseplan word voorgestel.
Deel 3 van die boek word gewy aan wetenskaplik begronde maaltydbeplanning vir verskillende tipes diëte wat in tabelle met foto’s van elke gereg uiteengesit word. Daarna volg ʼn inkopielys en pp. 49 – 189 bevat keurig geïllustreerde resepte. Die Indeks is ʼn groot pluspunt vir die boek, maar ek mis ʼn bronnelys.
Ek het Living the ultimate carnivore lifestyle een van die interessantste resepteboeke gevind wat ek ooit onder hande gehad het. Hoewel ek nie na ʼn karnivoriese dieet gaan oorskakel nie, het ek talryke gesondheidswenke raakgelees. Die dieetkundige inligting het my beïndruk, asook die heerlike resepte en die uitsonderlike foto’s wat elk ʼn kunswerk op sy eie is. Ek gaan beslis hierdie boek op my koffietafel uitstal wanneer ek nie in die kombuis doenig is nie.
Onnodig om te sê, is hierdie ʼn boek vir almal wat gewig wil verloor, wat ʼn gesonder leefstyl nastreef en vir diegene wat stylvol wil onthaal en daagliks gesond en interessant wil eet.
– Marlies Taljard