Foto 14 – Naghemel by SALT
https://photos.app.goo.gl/yMJaFhYqpg1ETy678
Sterrewag
Vir N.P. van Wyk Louw
By Sutherland se sterrewag
hang helder hemelliggame
teen die uitspansel in die nag.
Dis dáár waar eensame aardlinge
op die klein en silwrige planeet,
deur swaartekrag gegrond,
hoopvol op blom-groot sterre wag.
Maar die gode weet:
in hul diepste wese, ondergrond,
ontkiem ʼn donker plant
met reikwydte onverskillig uitgemeet.
Te laat
om die vervlegde rank
in die nanag-uur
te ontwortel óf te ontvlug.
Wanneer die hemelruim se sterretuin
vroegoggend in vergetelheid ingly
is al wat oorbly
weerlose wesens
deurweek van sterflikheid.
© Andrea Sieberhagen, 2026