fake news
daar verskyn ‘n politieke berig
oor iets wat heel waarskynlik
fopnuus is
dit klink soos Ali Baba
se veertig diewe
en iemand met ‘n tapyt
wat laag oor ‘n kommissie
van ondersoek vlieg
ook ‘n geskiedkundige paragraaf (nie verwant)
oor Romulus, Remus en Mars
asook klokke wat lui
oor Sappho se verse
en die vroue van Lesbos
wat geslagtelik verskil
maar soos die
‘Two-Spirited’ people
in Amerika is
gerugte wat sprei soos reën (sic)
uit die Middeleeue is,
lui dat ‘n Feodale stelsel heers
waarvolgens Marie-Antoinette
en die bourgeoisie in weelde leef
terwyl die volk van ellende sterf
daar is skok oor die Swart Dood
(wat hom in Covidtyd herhaal);-
brokkies van die dokter wat ‘n hart oorplant
en van ‘n man wat loop op die maan
alles dít, wat ons as wáár aanvaar…
wie sê dit wás, en ís,
nie net alles fabels,
feëverhale,
of teater nie?
© Anne-Marie Bartie, 2025