Goeie dag,
Ek dink ek skryf in die hemel in maar Oupa Pirow het Versindaba gereeld as sy klankbaan gebruik so as daar een plek is waar hy nog ‘n oog sal hou is dit hier.
Oupa het geweet van ons eersteling, maar daai eersteling het gekom en gegaan saam met die begrafnis. Kort daarna is die volgende eersteling oppad en hy is nou amper vier maande oud. Ons het in Keimoes onder die maansverduistering uitgevind van hom. Ouma kan nooit onthou nie maar ek weet Oupa sou dit geniet het.
Elkgeval, ek is ver van ‘n digter af, maar as Oupa nog hier was sou ek ‘n herdruk van Slaapmaats in Hadihie Hadida voorstel.
Die gedig gaan:
Die klein maantjie
lê op sy rug:
hy’s net soos ek
moeg gerinkink,
was heeldag weg.
Nou-nou slaap ook hy,
skoongewas en blink.
Nou, ek sou vir Oupa voorstel dat ons die “ek” in lyn drie verander na “jy” want as ons die gedig lees vir al die maats om slaaptyd, maak ‘n “jy” meer sin.
Ek kan dit nie met Oupa deel nie, maar die gedig met my verander is nou ons slaaptyd rympie. Eendag sal Robbie dit saam sê. Dalk kan een van julle meer gekwalifiseerde mense net saamstem met my dat ons in ons harte daai verandering kan maak.
Dis nou weer amper slaaptyd in ons huis.
Liefde en groete
Oupa Pirow se kleindogter met die jongste agterklein ding
Emmie Bekker