Labirint
Dié kronkelpaadjie is ’n labirint
waar bye oor rose en vygies draai,
’n katjiepiering sy blinkgroen glans vind
en die wisterias in trosse swaai.
Die visdam skyn, word ’n spieël van lug
met lig waar blare in ’n dans verdwaal.
Elke draai het ’n geheim, dan ’n brug
en om ’n hoek iets wat die wind ophaal.
Die wit rose en die pers vygies meng:
’n tapyt van geur en kleur, wyd versprei.
Die prieel verwelkom ons en verleng
ons soek na die pad wat na vreugde lei.
So dwaal ons verlore in hierdie tuin se sin
waar stilte en vrede telkens weer begin.
© Johann Lodewyk Marais, 2026