Foto 19: Rolbos/Tolbos
die ontwortelde
die klipgragte van die Amstel
hou die koue vas
die lig gly deur die wintersmure
om aan my boeke te kom vat
ek skryf vir jou
my broer
oor dinge verby die watergrens
die sirkel sluit – die vuur brand dáár
en ek sit buite die gesprek en kyk
’n jong man tuur
na die meester voor in die lokaal
ek hoor die ryp teen ruite pak
en meet die eensaamheid van die uur
die swart klaviernote bou balke teen die nag
die fuge reёn teen die ruit –
ek vlieg in weemoed
na my wêreld, suid
in my slaap word klip weer sand
’n droë wind waai uit die droom
stoot ’n tolbos oor die spoor
van ’n grondpad
dor en gestroop en sonder sap
los van die grond wat hom gemaak het
rol hy
alleen
oor die harde aarde:
’n grys pelgrim in die koue lig
ek is die doring wat die pad soek
en droom van hande wat my ken
© Pierce van Tonder, 2026
Hoe mooi is hierdie…
ek is die doring wat die pad soek
en droom van hande wat my ken
Puik gedoen Pierce!