Foto 18: Rogge Cloof Hemel
Foto in In gesprek met NPvWL – Google Foto’s
Omgekeerde Borduurwerk
Is die lewe nie ‘n omgekeerde borduurwerk
wat deurmekaar in die Melkweg
ons begrip van die mooi wat eintlik op ons wag
vertoon nie?
Was die Sewe Susters’s sprankel jou muse van die sterrehemel:
besig om woorde te pluk
Minerva se ragfyn goue sydraad span
– ink gedagtes –
in uitspansels van letters
waar een vir een manifesteer
drade styftrek
oor die natuur en Onsigbare Hande wat alles
stilweg in sterreknoopleidrade
so mooi aanmekaar flans en sekuur vastrek;
eenvoud in die grootsheid van absolute stilte
saamgespan in jou woorde om
moeilike konsepte
begrippe van nietigheid in die Almag
af te breek
te dissekteer
stuk vir stuk
bymekaar te smee
om die gewone mens toe te laat om die grootsheid te verteer in
woorde
wat niemand ooit sou vergeet nie
© Christa Kleynhans, 2026