Posts Tagged ‘Joan Hambidge gedig Grievable Lives’

Joan Hambidge. Grievable lives: Mournable bodies 

Monday, February 8th, 2021

 


Grievable lives: Mournable bodies 

 

In hierdie uur

van die groot Onrus

 

staan ek by die piramides

van Egipte in herinnering:

 

gebalsemde lyke

van konings en heiliges.

 

Ook die Asteke bewaar

in Mexiko hul godvrugtiges.

 

En by ons tans?

‘n Tekort aan doodsertifikate,

 

uitgestelde inentings,

oorvol hospitale ventilatorloos.

 

Vir wie of wat balsem

ek so tevergeefs

in my kommerkrale?

 

Daar is meer antwoorde

as vrae in hierdie infodemie.

 

Dood waar is jou angel?

Angel, hier kom dood

 

so mooi gekroon.

 

 

© Joan Hambidge, 2021