Synde ‘n boekhandelaar is dit uiteraard vir my haas onmoontlik om by ’n ander boekwinkel verby te loop sonder om in te gaan en te kyk hoe ons eie onderneming daarmee vergelyk. So gebeur dit dat vriend Luuk ons verlede jaar spesiaal na Maastricht neem waar die mooiste boekwinkel ter wêreld is. En ek bedoel dit letterlik. Verlede jaar is die mooiste boekwinkels (let wel: nie die beste nie!) deur The Guardian aangewys en Selexys in Maastricht was as wenner aangewys. Die rede? Wel, dis ongetwyfeld boeke in ‘n hemelse sfeer, want dié boekhandel is naamlik in ’n Dominikaanse kerk, wat 800 jaar oud is. Nou hoe de drommel kan ’n mens dáármee kompeteer?! Ter ere van ons eie beskeie winkeltjie te Bergzicht Plaza in Stellenbosch moet ek darem sê dat daar géén digbundels in dié hemelse ambiance te vinde was nie. Hulle hou dit gewoon nie aan nie; aldus die verkoopsdametjie by wie ons navraag gedoen het …
Ander boekwinkels wat die aandag getrek het, is Borderlands Science Fiction Bookstore (San Francisco), Shakespeare & Co. Antiquarian Books (Parys), die Akademiese boekwinkel Akateeminen Kirjakauppa (Helsinki), Lello (in Porto, Portugal), Borders Bookstore (New York) en El Ateneo in Buenos Aires. Laasgenoemde is in ‘n ou operahuis. (Foto’s van dié boekwinkels kan hier bekyk word.)
Nou ja, toe. Dis nou om die algemene opvatting dat die publikasie van iedere boek ‘n geloofsdaad is, ‘n bietjie té ver te voer is dit nie? Of steek die groen bokant van my onderbroek nou uit?
‘n Plesierige naweek vir almal. En onthou: dis die boek wat tel en nie die argitektuur nie.
Nuuswekker hervat weer op Maandag.
Mooi bly.
LE