Die einde van die maand is dit weer sulke tyd: Halloween.
In winkels, restaurante, en op openbare plekke sien mens spoke, spinnekoppe en ander monsters.
Ek is in Hong Kong en kan nie anders om te merk hoe groot die dag hier is nie.
As kind in Suid Afrika was Halloween nooit eintlik iets snaaks nie, nooit eintlik eens daaraan gedink nie. Dit het lank gevat vir die datum, 31 Oktober, om in te sink, en dit eers na lang jare in die vreemde, en baie blootstelling aan die Amerikaanse kultuur.
Wat is die logika agter hierdie geleentheid? Ek het so bietjie gaan google daaroor:
http://www.jeremiahproject.com/culture/halloween.html.
http://www.suite101.com/content/history-of-all-hallows-eve-and-halloween-a151474
In elk geval. Dit lyk of Halloween hier is om te bly. Ek wonder of is dit al meer gewild in Suid Afrika?
Daar is baie ander kulture ook wat die dooies onthou. In Suid Amerikaanse lande is daar “Day of the Dead” wat ‘n groot feesdag is.
http://en.wikipedia.org/wiki/Day_of_the_Dead
Ook Afrika kulture en selfs in Korea word die voorvaders ge-eer met geskenke, kos en spesiale dae gewy aan hulle welsyn. Dit word geglo dat die voorgeslagte mag het om die huidige geslag se welstand te beinvloed. Met ander woorde: hou die afgestorwenes gelukkig en bly self uit die moeilikheid.
http://www.associatedcontent.com/article/71765/traditions_for_honoring_the_dead.html
Het ons as Afrikaners ‘n tradisie waarmee ons hulde bring aan die voormense? Ek reken, in stories wat ons vertel, oomblike wat ons onthou en deel, en gedigte wat iets uitbeeld wat saak maak.
Oos Kaap ervarings
Veldblomme gepluk langs die pad,
die wintergras se waai so mooi.
Dan die verloop van die seisoen,
jaar na jaar, dan voel dit of hierdie
tyd nooit sal verbygaan nie,
dat ons altyd langs hierdie paaie sal ry
en na hierdie mooi dinge kyk.
Maar dit is nou verby.
Die plase is leeg.
Niemand kom drink koffie nie
in die kombuis is die stoof weggedra,
die vloerplanke uitgebreek en die deurkosyne
weggehaal deur onsigbare hande, net weg.
Hanslammers spook om die agterdeur,
nou net ‘n gedagte, weggewaai met
die winde van verandering.