Die na-dood
Breyten Breytenbach
In sy jongste bundel kom ons weer onder die indruk van Breytenbach se skerpsinnige én aangrypende digterstem. Die titel verwys na die tyd digby die dood maar ook ná die dood – vir Breytenbach ook Dina Dood – en roep op vernuwende wyses kenmerkende leitmotiewe op uit sy werk. Die digter is deurgaans bewus van die asimptotiese aard van skryf en tog word die verse ’n poging om die niesêbare op te roep (“daar jou taak, leesskrywer, kyk:/ om die niet se oopgaanwond/ stekie vir stekie met woorde /toe te werk.”). Tegelykertyd bied dié laatwerk ’n troos teen die dood wat wag, vir die digter én leser. Onthou word “’n bevrugting van die verlede”, en skryf uiteindelik “diep bevredigend/ om die laaste duisternis in jou asem te mag mond in Afrikaans”.
(Human & Rousseau, 2016. Prys : *R240; pp 216; Sagteband; Illustrasies : Ja; ISBN-13 : 9780798172462, Epub-ISBN : 9780798172479, Mobi-ISBN : 9780798172486.)
.
.
Baie geluk met nog n skitterende bundel wat nooit n dood gaan sterwe nie.
Dankie vriende, mede-reisigers en swerwers deur die lewe.
Hartlik geluk, Breyten – sien baie na Dina Dood en die illustrasies uit!
Veels geluk van my kant ook Breyten
Veels geluk met die eerste die-na-doder, Breyten. Mag daar nog meer in hierdie versbundel se voetspore volg.
Beste Breyten, van harte geluk met jou geskenk – die na-dood. Jou gedigte is stutte op die reis.
Baie geluk, Breyten, met hierdie nuwe bundel! En dankie vir gistraand se uiters interessante praatjie in Protea boekwinkel oor jou werk en werkswyses. Geniet die Dansende Digtersfees Saterdag… so jammer dat ek dit nie kan bywoon nie!