Unheimliche
‘n Laatnag stemboodskap in Zoeloe,
‘n gebed lui: Mag die Here jou seën
en mag jy rustig slaap …
Hierdie gebed, vertaal deur ‘n vriend,
dra my deur die nag by die afsterwe
van twee vriende, onverwags.
In hierdie tydvak keer ek terug
na Freud en die “Unheimliche”.
Die onbedoelde boodskap was vir my,
daardie een van ons faktotum,
bewys die verbintenis tussen die Sienlike
en Onsienlike; die Wete met Voorwete.
Alle teenstrydighede word ópgehef
in die numineuse, in die vermeerdering
van brode en visse, in die brug tussen
lewe en dood, met die wete dat verdriet
se teenpool uiteindelik sal voortleef
in durende herinneringe en veral Hoop.
© Joan Hambidge, 2022