verskille
die swart kat het blykbaar bloubloedlyne
hy neem net volroommelk met sy tee
in die fyn porseleinpiering waar rooi rosies
tussen sy growwe tong en klitsbaarde blom
hy is ook oordrewe skrupuleus oor sy kos
hy plat en roteer sy wit oorpunte weg
van die adellike hand se liefkosing
terwyl sy stert ópruk en sy spletige pupille
die gewer stil maar ysig, berispe oor die vis
waarvoor hy nie vandag aptyt het nie
daarenteen, die miniatuur reddingshond,
wat geduldig sit vir oggendwas en ‘n strik
en daarna haar goue pels blink en sysag
vlei op haar nooi se skoot, groot ronde oë
wat dankbaar en aanbiddend na
die sagte fluister van liefwoorde luister
sal met oorgawe haar maaltyd
se laaste morsels uit die bakkie lek
© Anne-Marie Bartie, 2025