Pase 2026
In hierdie Paasfees
roep ons die Heilige Gees aan
om die hostie en wyn
te verander in die liggaam
en bloed van Christus.
Daardie tyd by my ouers,
in ‘n blye wedersiens
skink my vader sjerrie in rooi glasies,
maak my moeder knoffelbrood;
toé reeds ‘n illuminasie.
In eensaamheid en in puin
wonder ons oor die epiklesis,
oor drie wyse manne uit die Ooste:
dalk eerder ‘n epifanie
van die verskyning goddelik?
Steeds in gedagtes en gedigte:
die hiérheid geplaas teenoor dáár,
waar alles één word vir my nou
in ‘n Allersiele dag (helaas nog nie November)
op hereniging met al die vertrekkendes.
© Joan Hambidge, 2026