70s kleindorpse opname
die esso bordjie hang
nie reg nie
hy is lank terug net so skeef gelos:
die wind klap teen hom
‘n woordelose tong
’n hond lê vergete
in die skadu
‘n windpomp langs die spoorlyn
staan teen
opskietmielies,
te laat vir die seisoen.
dit lyk na reën
in die kroeg is dit teen 11 uur nat
‘n glas breek,
die alledaagse gebeur
en
die horison is laag genoeg
om die lug net
swaar te weeg.
die dorp
middag sweef,
maar niks raak werklik
werklik eindelik
stil nie
© ND Cronjé, 2026