Ook elders aan diens nou
‘n Lykdig vir Franz
Agter op ‘n rekening van ‘n restaurant
(vir ‘n buitegas) begin ek ‘n gedig vir jou:
jy het altyd almal se voorkeure onthou.
Jy met die sagte hart wat my afneem
met die kamera op my selfoon langs Sting
oor die vorm van die hart waaroor hy sing.
Ek sien hoe jy na almal óm jou sal omsien
met jou bril op jou kop, in jou hand nou oop:
‘n bestelboekie vir beter begrip of verstaan.
Hierdie rekening sal ek namens jou vereffen.
Jy kan vanaand afvat ek sal met ‘n weersiens
eendag vir jou ‘n fooi gee en alles finaal afsluit.
© Joan Hambidge, 2026