Sonnette vind ek absoluut pateties
Speelse verse deur Robert Gernhardt, Christian Morgenstern en Joachim Ringelnatz
Vertaal deur Robert Schall
Daar word dikwels gesê dat Duitsers geen humorsin het nie. Of dié stelling nou juis is of nie, feit is dat daar ʼn groot aantal humoristiese gedigte deur Duitstalige skrywers bestaan.
Robert Gernhardt, Christian Morgenstern en Joachim Ringelnatz is seker die drie gewildste 20ste-eeuse Duitse digters van speelse verse. In hierdie bloemlesing is hulle gedigte in Afrikaans vertaal, met behoud van die rym, ritme, taalspel en humor van die oorspronklike.
Oor die vertaler
Robert Schall is in Duitsland gebore en het daar grootgeword. Hy studeer aan die Universiteite Karlsruhe (Duitsland) en Kaapstad en is Emeritus Professor in Wiskundige Statistiek aan die Universiteit van die Vrystaat. Hy vertaal GR von Wielligh se Boesmanstories in Duits as Die Sterne sind glühende Kohlen und Asche (Kuiseb Publishers, 2005). Sy vertaling van ʼn bloemlesing uit die werk van die veelbekroonde Duitse digter Jan Wagner verskyn onder die titel Wat ek van klippe weet (Naledi, 2021); dit was op die kortlyste van die SA Akademieprys vir Vertaalde Werk en van die UJ Prize for Literary Translation. Sy versvertaling van Johann Wolfgang von Goethe se drama Faust (Naledi, 2023) was op die kortlys van die SA Akademieprys vir Vertaalde Werk.
[Naledi, 2026. Sagteband. Formaat: 213 x 137 mm; 202 bladsye. Prys: R290.00. ISBN 9781997476375]