VIER LAASTES
1.
breyten is nie dood nie breyten sit in ’n grot
met ’n maag vol dennenaalde
stukkies boomgom ’n neut of twee
’n lyf ingesmeer met sout
aan die opkrimp
van die vernisboomtee
breyten is nie dood nie
hy lui nog sy klokkie
soos die gordel stywer word
om sy nek en lotusknie
breyten is nie dood nie
hy asem (in)(uit)(in)(uit)
agter sy sonbril
in ’n waas van blomme
2.
digters sterf nie in stoele nie
sug nie in hospitaalbeddens ’n laaste sug nie
dit hoort nie by digters nie
digters lê in slote met spuitnaalde
kniel by oorgehaalde haalgewere
of swaai aan ’n gordel
digters druk hul koppe in gasoonde
wag vir jou in ’n warm bad polse oopgenaat
stap met klippe in die sak die see in
digters drink te veel en val van geboue
druk die uitlaatpyp by die venster in
of spring van skepe tussen die skroewe in
digters en slaappille is bedgenote
wil die slaap aanhelp met morfien
in vlooierige hotelle stank van semen
kom dit by dié sensitiewe spesie
antie dood
gaan moet jy na die see-van-bome
om jou nering te verfyn
3.
ek kan maar wil nie vat
aan die uitgedolwe beendere
van die mal monnik
met die palmsere
vars is hy nog in sy kis
onaangetas deur balsem of wurms
wil ook nie litaneer
of fluister vir die dooies
ek is geen geesbesweerder
in ’n kapel uitgepleister met kopbene
4.
om te gaan slaap op die langste nag van die jaar
jou langste slaap ooit
soos ’n moeggespeelde kind
hande gevou bo die deken
brouers hou die brein botstil
ooglede hou op fladder
in die middel van die nag
gaan iemand in jou oor blaas
pak op kry jou pakaas
die boot reeds onder by die kaai
laat jou binneste sprei
om in die zauberkreis der nacht
net te rus te vaar te vaar te rus
te vaar
te rus
© Marius Crous, 2026
mooi horisonne