Charlton Lee George is gebore in Morningstar, Durbanville. Hy begin sy digloopbaan gedurende die skole-boikotte in 1980. In hierdie jare begin hy ook voltyds toneel te speel. Hy lees graag verse voor by massavergaderings, vakbonde en jeugbyeenkomste. Van sy gedigte verskyn in Akal, One day in June en ander publikasies van die Kongres van Suid-Afrikaanse skrywers. Hy het ook in Nuwe Stemme gepubliseer. Charlton is veral bekend vir sy rolle in o.a. die kykNET dramareekse Sara se Geheim en Die Byl, en SABC3 sepie Isidingo. |
Taxi
ons drome ryloop deesdae
op en af oor heuwel en vallei
sonder dat ons kan onthou
waar ons was in die diepnag
wanneer hane kraai en taxi’s
kompeteer met busse oor hoe hard
hulle mense kan wakker raas
douvoordag as die afgestorwenes
ons nog verlaat na ’n nag se huisbesoek
lank voor aan die son gedink word
in donkerte wanneer taxi bestuurders
vloek-vloek staan en koffie drink
en dik groen skywe trek
voor die koms van die eerste
werkers van die dag wat soos
fabriekzombies met gestorwe drome
hulle drie rande outomaties tel
en vorentoe uitstaar na die
donker voorvenster van die more
terwyl, aan die kantvenster,
’n skarlakenrooi berg groter gloei in goud.
Uit: Versindaba 2007, Marlise Joubert [samesteller], Protea Boekhuis, 2007