Margaret Cordier-Biermann is gebore op 28 April 1962 in Alexanderbaai aan die Diamantkus van die Noord-Kaap — ‘n landskap van see, woestyn en wydtes wat haar poëtiese verbeelding van kleins af gevorm het.
Haar liefde vir skryf het vroeg ontkiem: skoolkoerantbydraes, redenaarskompetisies, kunswedstryde en leierskapposisies op laer- en hoërskool. Dit was juffrou Elize Swart wat die jong Margaret aangemoedig het om onbevange te skryf. Daardie vryheid het gebly.
“My pa, ‘n wetenskaplike, het my nuuskierigheid geprikkel oor wiskunde, astrofisika en die bestaanswêreld buite tyd, ruimte en materie — ‘n invloed wat vandag nog sigbaar is in die wyse waarop ek groot vrae met ‘n oop hand dra. Daar was ‘n binnekring van geloof.”
Na matriek aan Hoërskool Rustenburg studeer Cordier Afrikaans aan die Universiteit van Pretoria, en voltooi later ‘n BA-graad met hoofvakke Kriminologie en Sielkunde aan UNISA. In 2019 verfyn haar ambag aan die Potchefstroom Skryfskool onder leiding van prof. Hans du Plessis, prof. Bernard Odendaal en digter-taalkundige Louis Esterhuizen. Chris Brunette het ‘n beslissende rol gespeel deur haar aan te moedig om gedigte na LitNet te stuur — dit het Cordier se stem in die breër Afrikaanse literêre gesprek ingebring.
Versindaba sou die oop ruimtes bied vir woordvlug met goeie begeleiding.
Prof. Ian Raper het tot kort voor sy dood ‘n sinvolle bydrae gelewer tot Margaret se werk.
Haar gedigte het verskyn op LitNet en Versindaba. Sy sal altyd dankbaar bly teenoor Chris Brunette en Marlies Taljard.
Van haar gedigte is opgeneem in die bloemlesing Gelykmaker: Covid-19-gedigte (saamgestel deur Fanie Marais, 2020), Stemme uit die Suiderland (GHA, 2022), en Flikker-gram (saamgestel deur Marlies Taljard, Naledi). In 2019 is haar gedig ‘My hart’ uitgestal in die Groengallery van Digters by die Taalmonument in Paarl — een van elf digters in Suid-Afrika wat hierdie erkenning ontvang het. Gedigte het ook verskyn in die Vrye Weekblad (2024) en die Kaapse Kontrei Nuusblad.
BUIGBREEK – haar debuutbundel (Cordis Trust, 2021) is op RSG Radio Suid-Afrika se Vers en Klink op 28 Desember 2021 voorgelees. Die digter se woordreis ontbloot haar belewenis van toegepaste landings in gietnagte en die inwerking daarvan op haar lewe. “Eindelik kan ons soos arende opwaarts klaar in vlug na ʼn bergbreek wat roesrooi môres bring.”
Margaret woon tans in Googong, Canberra, Australië, saam met haar man. Die afstand van die geboortegrond het nie haar stem stil gemaak nie — dit het dit skerper geslyp. Sy werk tans aan nuwe skryfprojekte.
Sy skryf vanuit die ‘wagterspos’ —die plek waar horison en woord ontmoet, met inspirasie van God die Digter (TT- Cloete)
Sambrele in die son
hoekom loop al die vroue
van Suid-Afrika nie
met sambrele in die son
dink net hoe kan
so ‘n verskroeide land
weer blom
© Margaret Cordier, 2022
Terugblik
gister se reën het opgedroog
die uitspoelvoortjies lê
ingeëts aan die oppervlak
ek tel my kop op
— kyk die lug
in die oë
geen bliksem
of donder
sal my verskrik
my opvangskottel loop oor
© Margaret Cordier, 2022