Vrouedigter skud fundamentaliste

Hissa Halil

Hissa Halil

In ‘n vorige Nuuswekker oor Metrofobia het ek geskryf oor die fanatiese aanhang wat die digkuns  in Arabiese lande geniet. So is berig oor ‘n TV program, “The Million’s Poet” wat op die Amerikaanse Idols-konsep geskoei is en sowat 70 miljoen kykers lok … Selfs meer as die kykers vir sport en nuus.

Nietemin, volgens ‘n berig op die BBC se webblad het kontroversie nou uitgebars rondom Hissa Hilal, wat na die finaal in Dubai deurgedring het nadat sy ‘n hekelgedig oor die ekstremistiese politiek van Islam in die laaste uitdunrondte voorgedra het. Totaal in ‘n swart abaya geklee, met net haar oë sigbaar, het sy agter die mikrofoon stelling ingeneem en onder luide applous die Moslem fundamentaliste in ‘n snerpende stem afgekam.

In hoofsaak het haar hekeling oor die gebruik van fatwas deur die geestelikes om mens in angs en beheerbaar te hou, gehandel. En ja, uiteraard is haar optrede deur doodsdreigemente gevolg. “What made me so angry is seeing the Arab society becoming more and more kept to itself, not like before – loving and caring and sharing and open and welcoming everyone,” het sy aan die BBC se World Service gesê. “Now, even if you want to be simple and nice with others, people are asking themselves whether it is haram [forbidden] to say hello to strangers,” en bygevoeg: “I blame those who have led the people, and directed them this way.”

Blykbaar was haar wrewel in die besonder gemik teen ‘n Saudiese sjeik, Abd Al-Rahmaan Al-Barraak, wat glo ‘n fatwa oor die sosiale verkeer tussen mans en vroue wil uitroep. Interessant genoeg was Hilal se voordrag in die volkstaal, Nabati, en nié in die amptelike hoog-Arabies nie.

Nou ja, toe. Nou lê Dubai en die moontlike eerste prys van 1.3 miljoen US Dollars vir haar voor … Hopelik sonder dat daar inderhaas ‘n fatwa oor haar uitgespreek word.

Op die BBC webblad is daar vele reaksies deur haar ondersteuners wat gelees kan word. Ook is daar via De Contrabas ‘n skakel na YouTube waar jy na haar voordrag, met die Nederlandse teks as onderskrif, kan luister.

***

Sedert gister oggend het daar twee nuwe plasings op die webblad bygekom: Andries Bezuidenhout wat ‘n skildery by ‘n gedig voeg en Ilse van Staden wat vertel van die binnensmondse sang van voëls. Fassinerend. Dan het ek gisteraand sommer weer ‘n paar skakels geplaas op “Klikbord”. Gaan kyk gerus na De Papieren Man se wonderlike nuwe webtuiste; lees Cerneels Lourens se nabetragting van die hofuitspraak ten gunste van taalregte wat op LitNet geplaas is, asook die resensies wat Maandag in Beeld en Die Burger verskyn het oor oor een van die belangrikste digbundels die afgelope maande: Gilbert Gibson se oogensiklopedie.

Lekker lees en mag hierdie dag sy sagste wang vir jou draai.

Mooi bly.

LE

 

 

Bookmark and Share

Een Kommentaar op “Vrouedigter skud fundamentaliste”

  1. Louis :

    Since end of April last year, Ernest. Thank you for the compliment. By the way, you can read more about the history of this site at the following link: https://versindaba.co.za/oor-versindaba/
    Regards,
    Louis

  •