Andries Bezuidenhout. Toeris in Hillbrow

Ek het vir vyf jaar lank elke tweede week ʼn rubriek vir die Sondagkoerant Rapport geskryf. Daardie tyd is nou verby – dankie tog! – want dis straf om elke tweede week aan iets oorspronkliks te moet dink. Jou kop is konstant daarmee besig. Dis tóg ʼn goeie dissipline, veral die sweep van ʼn streng woordbeperking (623 woorde met Rapport se nuwe formaat, om presies te wees).

Jare gelede het ek ook ʼn rubriek vir LitNet behartig, maar het vinnig stoom verloor – ek dink deels dalk omdat ek sulke laaaaaaaaang stukke oor musiek en kultuur geskryf het.

ʼn Tyd gelede wil die uitgewers Human & Rousseau toe weet of hulle nie ʼn keur uit die rubrieke kan uitgee nie. Dis iets wat Anne-Marie Mischke ook voorgestel het, jare gelede toe sy nog die rubrieke vir Rapport behartig het, maar toe was daar nog te min om van te kies.

Verlede Desember het ek dus ʼn paar weke spandeer om deur al die rubrieke te werk – in Rapport en op LitNet – en ʼn keuse te maak. Rubrieke wat oor spesifieke nuusgebeure handel, meer as die helfte, moes snippermandjie toe – die medium gaan tog oor dinge van vlietende belang. Soms is daar egter ʼn rubriek wat iets meer sê – spesifiek oor dinge soos herkoms en identiteit. Sulke rubrieke het ek gehou. Ek het verdere tyd spandeer om te dink oor ʼn sinvolle, tematiese volgorde vir die klompie wat oorgebly het.

Die boek is nou op die rakke. Die titel is Toeris in Hillbrow.

Dis lekker as jy ʼn fase van jou lewe kan afsluit met iets soos ʼn boek. Nou het my kop weer meer ruimte vir gedigte, skilderye en musiek.

Bookmark and Share

4 Kommentare op “Andries Bezuidenhout. Toeris in Hillbrow”

  1. Desmond :

    Het die boek anderdag in hande gehou. Nog nie gekoop nie, jammer! Maar dit is ‘n baie mooi boek, ek hou van die omslag. Selfs met jou daarop en al… 🙂

  2. Andries Bezuidenhout :

    My kollega Jackie Cock se kommentaar: “Andries, this is not a very flattering picture of you…”

  3. marlise :

    Geluk met die nuwe boek Andries. Ek hoop dat jy ‘n praatjie kan kom lewer op Stellenbosch hieroor…Mmm, ek hou weer baie van die foto van jou op die omslag.

  4. Andries Bezuidenhout :

    Dankie Marlise! En ek is weer bly jy’s terug in aksie. Ek kom begin Augustus Kaap toe vir die book fair. Hoop ons kan dan ‘n glasie klink.

  •