Vriende, kollega’s,
Ek wil graag ‘n nuwe publikasie onder julle aandag bring. Die titel is Imagine Africa en dit het so pas in New York verskyn.
Die uitgewer is “Island Position” – ‘n ‘spasie’ wat tot stand gekom het om die produkte (verslae, studies, handboeke) van Gorée Instituut te publiseer met inagneming van gehaltebeheer, estetiese versorging, verspreiding en dergelike, en dan uiteraard ook in samewerking met kommersiële uitgewers in ander tale en gebiede. “Island Position” se eerste onafhanklike produk met ons nuwe logo is die bogenoemde bundel tekste saamgestel met die koördinering van die Pirogue Collective. Hierdie kollektief vergestalt die voorbereiding en aanbieding van kuns- en ander kreatiewe aktiwiteite van Gorée Instituut.
Julle kan meer inligting oor die aktiwiteite en geskiedenis van die Instituut op ons webwerf kry – www.goreeinstitute.org – en ‘n beter oorsig oor die aktiwiteite van die Pirogue Collective op www.piroguecollective.org .
Imagine Africa is ‘n ware kaleidoskoop van tekste wat elk op ‘n eie manier ‘n stuk morele verbeelding afpen. Dit bevat essays, verhale, gedigte en genre-oorskrydende skryfsels. Ook ‘n reeks afbeeldings van die grafiese werk van Amadou Kane Sy, ‘n Senegalese kunstenaar. Die bydraers is Hervé Ludovic De Lys, Corsino Fortes, Charl-Pierre Naudé, Adam Small, Edouard Glissant, Patrick Chamoiseau, John Mateer, Trudy Stevenson, Eben Venter, Shailja Patel, Ngugi Wa Thiong’o, Stephen Ellis, André Naffis-Sahely, Tahar Djaout, Alex De Waal, Ayesha Harruna Attah, Fabrizio Terenzio, Yusef Komunyakaa, en Breyten Breytenbach. Benewens die oorwegend Engelstalige tekste sal julle ook Frans, Gikuyu, Kaapsrikaans, Portugees en Kriula (die taal van die Kaap Verdiese eilande) daar teëkom.
Verder wil ek niks daaroor sê nie want julle moet die objek in die hand neem en daarin begin blaai om te sien waarvan ek praat en waarom dit belangrik is.
Ek hoop julle boekwinkels bestel ‘n aantal eksemplare. Ek hoop julle koop die boek. Ek hoop julle lees dit. Ek hoop julle stel genoeg belang om van naderby kontak te maak met die Pirogue Collective.
Die koördinerende redakteur se naam is Adam Wiedewitsch (adam@piroguecollective.org).
Groete,
Breyten Breytenbach
Daar is vandag ‘n beriggie oor die publikasie in Die Burger. Louis, ek plaas sommer nou my bestelling vir ‘n eksemplaar.
Francis Galloway
Louis, soos jy vanoggend op Die Burger se voorblad sou gesien het: meer ruimte is afgestaan aan die nuus dat Nicolas Cage se seun met ‘n Suid-Afrikaanse meisie getrou het as aan die voorgestelde mediawet (of wat mens dit ook al noem). Met sulke koerante, hoekom dink die regering hulle het ‘n muilband nodig?! Maar nou ja — jy s^e altyd ‘n volk kry die digters wat hy verdien. Ek skat hulle kry ook die koerante wat hulle verdien.
Dankie, Breyten. Ons het reeds vandag bergin soek na verskaffers; met min sukses. Wag nog op ‘n antwoord van die koördinerende redakteur. Het werklik fassinerende stukke op die internet te lese gekry.
Desmond, wil jy solank met jou plaaslike biblioteek begin onderhandel? Dit sal bepaal hoeveel kopieë ons bestel wanneer ons die kanaal geopen kry …
Ai, hoe opwindend is die tye nie wat ons tans beleef nie. Hoeka met wetgewings oor geheimhouding in diesulke dinge daarby ingesluit. 🙂
Laat my kwyl om die kiewe.
My droom is nog altyd om eendag soos Marcus de Jong van toentertyd bepaalde boeke onder die toonbank deur na sekere (geselekteerde) kliënte deur te gee …
Ai, ai, ai.
Louis
ISBN 978-1-935744-99-3
Daar’s werklik fassinerende dinge in. Lees o.a. die pragtige verhaal van Ngugi.
Hierdie lyk fassinerend. Breyten, het jy dalk al ‘n ISBN nommer vir die boek? Ek wil graag ‘n kopie of twee vir die biblioteek bestel.