Protea Boekhuis het pas bekend gemaak dat Melt Myburgh se bundel, Oewerbestaan, bekroon is met die Ingrid Jonker-prys vir 2011. Dié prestigeprys is in die lewe geroep deur vriende van Jonker. Dit word al om die ander jaar aan Afrikaanse debuutbundels toegeken en gedurende die alternatiewe jare word Engelse debuutbundels bekroon.
Oor Oewerbestaan het die uitgewer die volgende te sê gehad: “Met Oewerbestaan lewer Melt Myburgh ‘n debuutdigbundel wat beslis aandag gaan trek. ‘n Groot aantal van die gedigte het te make met die landskap van die Noord-Kaap aan die oewers van die Oranjerivier waar die digter groot geword het. In die eerste afdeling word die tema ‘refleksies’ ontgin en verwys na sowel die weerkaatsings van die lewe in dié droë, warm wêreld as na die besinning oor die betekenis wat die gebied en sy mense vir die digter ingehou het. In die afdeling ‘om federico’ is ‘n aantal gedigte oor Spanje, waar die landskap sterk herinner aan dié van die Noord-Kaap, maar wat terselfdertyd ook onmiskenbaar die wêreld van die Spaanse digter Federico García Lorca is. In die afdeling ‘gesigte’ is gedigte oor visioene, onverwagse insigte en ook ontluistering, soos die gedig ‘‘n beeld raak los’ waarin een van die sementbeelde in die Uilhuis op Nieu-Bethesda afgetakel word tot net die skelet van bloudraad oorbly.Die laaste afdeling, “inkdood”, bevat gedigte oor dood en verval wat die digter met sy skryfwerk probeer besweer.
Dis ‘n bundel hierdie vir die fynproewer. Die gedigte oor die Noord-Kaap vul ‘n leemte oor ‘n landskap wat nie dikwels in die Afrikaanse poësie aandag kry nie. Die homo-erotiese gedigte behoort aanklank by gay lesers te vind, maar dis beslis meer as ‘n bundel gay poësie.”
Melt Myburgh is tans die Woordkunsprojekbestuurder wat vir die jaarlikse Woordfees op Stellenbosch verantwoordelik is. Hy is ook die organiseerder van die jaarlikse Versindaba-poësiefees wat vanjaar op 23 en 24 September in Stellenbosch plaasvind.
Let wel: Die Ingrid Jonker-prys Komitee se amptelike persverklaring sal geplaas word sodra dit ontvang is.
Nog leestof:
Bernard Odendaal se resensie oor Oewerbestaan.
Die digstring oor die gedig “Toeval” uit die bekroonde bundel.
Die onderhoud wat met Melt Myburgh ten tye van Oewerbestaan se verskyning gevoer was.
[Protea Boekhuis, R140.00 (BTW ingesluit) ISBN: 978-1-86919-369-0]
Baie geluk Melt! Oor hierdie toekenning twyfel ek nie eens nie. Dit was een van die opwindendste bundels (met beeldryke taalgebruik) wat ek die afgelope jare gelees het! Doe zo voort.
Skotepetoors! Baie geluk, Melt.
Baie dankie. Monty en mnr. Breytenbach. Dis vir my ‘n eer om op hierdie wyse met die nalatenskap van Ingrid Jonker geassosieer te word. Vir haar en Jan en Uys sou ek van bewegende treine spring en op koue stasievloere slaap.
Veels geluk, mnr. Myburgh! Ek is amper seker (mens moet eintlik nie woorde in die dooies se monde lê nie) dat Uys en Jack en Jan en Ingrid self net so bly sou gewees het met u prestasie. Die Ingrid Jonker is ‘n besonderse prys. Die eer is verdien. En moet nou nie gaan ophou skryf nie!
Hartlik geluk met hierdie gesogte prys.
Bou so voort aan on miskenne taal.