Andries Bezuidenhout. Decline of the American Empire

Koeëls, ʼn knal – soos die naam Gavrilo Princip – kondig keerpunte soms aan

en beland só in geskiedenisskribas se annale.

Meestal kom dit egter ongesiens – ʼn skarnierwerwelstadspoort

wat langsaam toeswaai, op grendel knip

tot een oggend as vlugtelinge besef dis te laat.

 

Voormalige imperiale pleine is met beide vertroud –

die eensklapse besef of die tyd se sluipgewaarwording.

Vra maar vir Wene, wat steeds nostalgies water trap.

 

Ons huur ʼn woonstel in Paniglgasse vir ʼn dosis museum en monument,

ontmoet ons landlord by die voordeur vir sleutel en transaksie,

loop twee Amerikaners op die trappe raak –

swaar dra, inkopiesakke, al aan die een kant,

swaar dra, toeristekamera, al aan die ander kant.

Sê die een: “We’ve come to spend you out of your economic crisis.”

 

Ons landlord mompel, met Oostenrykse aksent:

“With money borrowed from China.”

 

11 September 2012

Bookmark and Share

Comments are closed.

  •