En daar spring Andries Bezuidenhout my voor! Net toe ek klaar geskryf het aan my verslaggie en dit wou plaas, sien ek sy lekker fotobeeld (https://versindaba.co.za/2012/10/15/andries-bezuidenhout-melville-poesiefees-fotobeeld/) van die fees. Laat ek dus liewer net aansluit by sy beelde.
Die gees was daar, Vrydag was die strate nat, die wolke donker en ons was bevrees dat dit meer Woodstock as Melville gaan wees. Maar toe Hennie Meyer Saterdagoggend nege-uur die mieliepitte begin pak op die tennisbaan, was dit droog – soos vere.
Die duiwe het dalk nou al die hele gedig opgepik, ek weet nie.
Ek het baie sessies bygewoon, Afrikaans en Engels, voorlees en performance, stigtelik en dansend – oral het ek iets interessant gehoor. Op die sypaadjies is vriendskappe gesmee of sommer hervat of losweg teen die vensters uitgeasem om drywend daar te wag tot volgende keer, volgende jaar.
Bekende, minder bekende en heeltemal onbekende digters het gemaklik skouers geskuur en in gemengde groepe voorgelees. Daar was ook twee Oopmond bekgevegte, waar ek Toast Coetzer en Danie Marais sien kragte meet het.
Doodmoeg het ons Sondagmiddag om en by halfses klaargemaak. Daar was digters van Kaapstad en Durban, kruis en dwars het hulle gekom, gewapen met bundels en CD’s. Bontspul, was ons. Heeeerlik!
Ongelukkig het ek die twee belangrike paneelbesprekings nie kon bywoon nie, ek het egter straatpraatjies gehoor wat die “lojale verset”-onderwerp voortsit. Die digter as “sexual shapeshifter” is net-net buite my gehoorveld ernstig bespreek oor snye pizza, oor bottels water. Kuier-kuier die aand in. Nouja, volgende jaar maak ons weer so.
Hoor hoor!
Nou nie dat ek vir Kaggen soos ‘n kat in die sak probeer verdrink nie!
Ek wonder soms hoekom die Hollandse ‘Nijlpaard’ by ons ‘n ‘seekoei’ geword het. En of Broederstroom in Sustersee mond. Maar van wonder gaan die son seker onder, wonde en al.
Seekoei by die stert beetkry? DAAR’s nou vir jou ‘n sexual shapeshifter.
Andries (kan dit nie weerstaan nie – en die bedoeling is vriendskaplik): maar as jy die ander oor ook was hoop ek nie jy kom agter jy het die seekoei aan die stert beet nie.
Groete,
Breyten
dankie Andries, dit sal gaaf wees!
Rene, ek was by die een oor die digter as sexual shapeshifter & sal iets daaroor skryf.