Plekgedig 13: Koos Kritzinger. Gebed vir Ventersdorp

Gebed vir Ventersdorp

 

ʼn Plattelandse dorpie

met ʼn imposante NG-kerk,

op die grond van JH Venter –

hy’t hier sy plaas bewerk.

 

Die omgewing is waterryk,

vrugbaar die Mooiriviervallei,

en uit Schoonspruit se oog

word mineraalwater gekry.

 

Die eerste plaas in die kontrei

het Sterkstroom geheet –

miskien het dit profeties

van onderstrominge geweet.

 

ʼn Sterk man met gryse baard

en bulderende stem,

het hier sy kleim afgesteek

om veld vir sy volk te wen.

 

Geboortedorp van die weerstandsleier-

hier slyp hy sy Afrikaans –

is ook laaste rusplek van die vegter –

teen geweld had hy helaas geen kans.

 

Van politiek en retoriek,

onvrede en van kwaad

het ons plattelandse dorp

meer as genoeg gehaat.

 

Die aartsbiskop van die Anglikaanse kerk

het ook sterk bande met die dorp;

hy word later met Nobel vereer

vir sy versoeningswerk.

 

O, Alfa en Omega, leer ons om te bid;

om in die liefdes-ABC te vra

dat ANC en AWB – of watter ander letters daar mag wees –

mekaar in liefde sal verdra.

 

Versoening versus weerstand,

vergifnis versus wraak:

mag God die dorp – en ook ons land –

behoed en oor sy mense waak.

 

Bookmark and Share

Comments are closed.

  •