Plekgedig 16: Mariette Wenhold. Swartruggens

Swartruggens

 

waar de la Rey gekanonvuur het

loop ek

hy vorstend galop het

sit ek

sy hart trompetter het

bloei ek

 

kerk verberg tussen loopgrawe

met prulle vul van munisipale

vandalisme op eregrafte

staalkruise vir ponde geplunder

selfs die ingelse monumente nie ingeburger

 

dan kom die reën

 

elders my wanstaltige gedagte

velde vol skilderye groen

maak bees en skaap dankbaar kraam

kleine kalf mooie lam

en skitterend op die berg se kruin

staan wit die kerk in haar trourok van kant

ek is bly oor my stukkie land

 

waar hy gedut het

rus ek

hy getwyfel het

jubel ek

hy gebid het

bid ook ek

 

 

Bookmark and Share

Comments are closed.

  •