Trompsburg
jy was my eerste Voortrekkerstraat
die eerste een wat ek kan onthou
jy het my fietsspore in jou modderpaaie
gehou tot die volgende reën
ek het die sterre onthou wat jy my gewys het
die satelliete en Haley se komeet –
dieselfde satelliete wat ek nou gebruik
om na jou op Google Earth te kyk
met die reünie het jou skoolsaal kleiner geword
as wat ek kon onthou, en groter
my maats het ouer geword
en jonk gebly
snags in my drome nooi jou motel se neonlig
my om die hoofpad te verlaat
en om met kinderbene met my fiets
die strate te verken met my kinderhart
op die sirkelpad wat ons almal bou
wat begin by die plek
waar die einde ons laat
sien ek dan iets uit my kinderonthou
sien ek dan weer jou Voortrekkerstraat