op Randfontein
nog vis nog vlees
nog stad nog dorp
nog platteland nog plot nog plaas
nog informal watsenaam
as die rooidag breek
is meeste al op pad
of taxi of trein of voete
na josi
of tonnels
en vanaand
vanaand as die vaak al diep in die lyf is
kies die kar se ligte
die afdraaipaadjie na die huis
so is dit
op hierdie slaapdorp
van ons
waar die aarde skud
en waar die witsand waai en waar die fonteine
suur uitsyfer
waar crime lê en loer
en loer
saans (of bedags) kry jy hul in jou huis
of as jy gelukkig is
‘n leë stofkol sonder tv
met ‘n mall en al
word daar naweke
getwis en opgemaak
ons hier en hulle daar
en soms deurmekaar
nog vis nog vlees
tussen mynhope en graansilos
tussen vashou en laat los
waar die grond
omgedolwe
skagte gegrawe word
en tonnels
oopgebreek word
miertonnels
tonnels tonnel ons
tot
die aarde waaruit voedsel moet kom
oopgebreek
uitgedolwe
vol gate gelos is
met sy hande
breek die mens
rotse
keer die dieptes van die aarde om
grawe gange
agter klaterskatte aan
ertse vol leë drome
stop waterare toe
los alles vol gate
sandhope
met ‘n handvol niks
goud in die grond
geen brood op die tafel
goud in die dorp
geen hartlikheid
kry nie reg om tonnels
na mekaar te bou
hoofstraat aangelapte
besighede
goud in die land
geen vrede
oorlog op oorlog
jaar na jaar
goud in die beursie
goud in die bank
(van Engeland)
mense kom bedel ses koppies sop
by die kerk
Randfontein is wit en goudbruin en kwarrierooi
stofwit
goud
vuilgoud
rooi
bloedgestorte rooi
maar randfontein
is mooi
kindermooi mensemooi
ons kuier
en bou aan drome en mynhope
nola en delmas en aranda
grondboontjie en mayonnaise
komberse en pellets
baie baie karre secondhand
mere en gifwaters
fonteine wat doodborrel
nog rand
nog geld
Randfontein
amper iets
amper niks
gatsrand gate sinkgate
Randfontein
en sy geskiedenis
sing ‘n snaakse deuntjie
westergloor toekomsrus mohlakeng,
kocksoord middelvlei finsbury brandvlei
zenzele jabulani badirele orthambo
helikonpark culemborgpark west porges
robinson lake riebeeckmeer greenhills homelake
loumarina elandsfontein randgate boothaplotte,
connie mulder sirjb robinson siralbert robinson dick cooke
geen elande geen fontein geen vlei geen meer meer
geen visvang geen pieknieklewe
– klein dogtertjies word hier vermoor
vir ‘n selfoon –
in randfontein meer nie
Randfontein
amper iets