Calvinia
moenie vrae vra
of eens bespiegel
hóé ver terug kán ‘n kind onthou:
want oogpisters in die geut
neffens die koestering
van ‘n oop werf se wildevy
nestel nóg
(warm soos moederliefde)
as ek laatmiddag
verby die boekehuis ry
en pennielegging om die kerk
en tiekie-aande
flits in foto’s onbeperk verby
daar is name wat my vasmaak
in bloed en wéét
klipwerf en kotjieskolk
slingerfontein en matjiesvlei
die bloukopkoggelmander
wat my dophou
priem-dreigend van die platterkrans
van anderkant die drif
waar ek voëls moet verskrik
onder die soetpruimboom
se doekkombers
keelseer op die puts
en die sagte troos
van skuinskoek en gedrukte vy
die reuk van dassiepis
legendes oor oupa klaas honderd
en groot toren se louws
calvinia
is die hantam
met die ruimer vlaktes
die geiler somers
die yler winters
en lentes
wat angste uit jou hart kom ruk
en ‘n herfsgety
wat jou tong laat woorde maak
jy klim steiltes teen rebunie
en hoor hoe ma nog sê
met die vloed
het die sakrivier
soos mofskaap oor die land gekom
kambro en botterblom
kaktus en turksvy
die growwe grein
van wingerdblaar
as jy korrel-korrel
steel van die prieel
met ál die geure
van melkkos en kaneel
in my geheue vasgemaak
bly dit die plek
van lewensdrif en aardse rou
daar het ek léér sien én hoor
leer bid
soos lammervanger en dassie
soos rodin se denker
op leiklip rondgesit
die wydsheid van my wêreld
het ‘n horison sonder soom
dáár het vers en poësie
soos die ewigheid
binne my kom woon
Baie dankie Sakkie: hoe nuuskierig word ‘n mens nou om almal algter die name te kon ‘sien’! Groete, M
Puik! Treffend! Dis waar ons groot geword het.
Gedig het my meegevoer en ek het sommer weer klein gevoel.
Baie dankie aan een en almal vir jul meelewende en positiewe kommentare op my gedig … dis vir my baie lekker om te dink julle kon saam met my die ruimtes van my kontrei ervaar. Baie dankie ook aan Versindaba vir die “boost of confidence”!! En natuurlik aan Cordis Trust wat hierdie geleentheid geskep het – hierdie dag het vandag ‘n eie lingua franca gespreek. Groete, M
Uitstekend; die vers roep met klank en beeld ‘n skildery van Calvinia en sy streek met vele fasette op… en die heimwee na ‘n grootwordstreek.So mooi!
Marie….dit is skitterend geskryf…!!!
Calvina – nostalgies onthou ek weer vandag “my liewe lekker Hantamwyk”
Pragtige beelde wat selfs geruik en geproe kan word!
‘n Lieflike ,beeldende en klankryke vers …met die lees (en herlees,omdat dit sulke pragtige herinneringe oproep)leef ‘n mens jou in elke faset van die lewe en lekkerkry as kind in.Pragtige vers met ‘n treffende slot!
Ongelooflik hoe hierdie gedig jou laat voel asof jy self in Calvinia grootgeword het. Mens voel so eie met die gedig. Skitterend gedig!!
Hierdie gedig praat met my deur ryk beelde en emosie..
Dis pragtige gedig vir die mooie Karoodorp. Dis waar mense nog plat op die aarde opgte mense is.Die gedig beskryf dit net so opreg. Dink nou sommer aan die Groot Posbus en die Hantamhuis. Dis ook een van die belangrikste sentrums van wolproduksie in Suid-Afrika. ‘N Bedrf waarby ek lank betrokke was as Redakteur. Meer oor die dorp: Daardie sinagoge met sy kenmerkende art-déco-boustyl verwys na die belangrike rol wat Joodse inwoners vroeër in die gebied gespeel het. Dit huisves nou die Calvinia-museum.
My kinderjare-herinneringe aan Calvinia speel deur hierdie vers opnuut voor my af. Briljant!
Dit is die soort vers (as ek dit so kan stel) wat ek van hou! Baie beskrywend. Kan myself op daardie plek plaas!
Calvinia Ongelooflike mooi beskrywende sielsgedig!
Hier kan jy Calvinia sien, ruik, hoor, voel en proe. ‘n Baie suksesvolle pleknaamgedig!
Calvinia:’n Gedig so na my hart!