Binne die Oog
Vir Ingrid Jonker
Laat my tydelik ontvlug
uit hierdie storm
om met Jou te wees
binne daardie plek
waar verlange my
nie meer kan volg
binne daardie plek
waar die antwoord:
dis verby, dis verby, dis verby
se eggo verdof.
Laat my tydelik instap
uit hierdie storm
om met Jou te wees
binne daardie plek,
want binne hierdie storm
is dit so swaar
om te laat los
in die spieël te kyk
te weet:
ek was blind
dis gebreek
ek was alleen lief.
Laat my tydelik verdrink
uit hierdie storm
om met Jou te wees,
want Jy was bitter alleen
te veel, te seer, te permanent
het Jy Jou binne daardie plek
geanker, Jonker, geanker
binne die oog:
voor lewe en na dood.