Lykdig 37: Gerda Taljaard. requiem vir dorothy parker

requiem vir dorothy parker

 

op die 8ste vloer van haar sterrewag

in new york, new york

gryp sy die nag

en trek dit om haar skouers

soos ferweel

 

en raak ontliggaam, haar gesig

drywend en beenwit

die onbereikbare planeet dorothy

en tog

 

lê daar spore om haar oë en mond

wanneer sy vir oulaas kom

op valium en vodka

en roep om god

 

met die teleskoop na binne gekeer

hoor sy die heelal in haar skedel

inkanteer

 

how lucky are the dead

 

how lucky can a girl get

who has died many times

before she was dead

 

Bookmark and Share

Comments are closed.

  •