toegeskulp [re: ingrid jonker]
met jou lief en leed as maagdteken
van dag een
tot by drieankerbaai
~ waar skeepsliggies skrams jou poësie
kon sien
wat tafelberg internasionaal verfraai ~
het jy toegeskulp
gegroet
jou letterwoord het bitterbessie geword
swaartekrag jou vrye dans kom haal
en aan die uitspansel verkoop
kindspore het vervaag
en die somer van dertien jaar
tot grootmenslewe
het minder begin weet
van vryheid
van omgee
en van geliefdes wat ‘n handdruk gee
jy wou tóéskulp…
ontvlug
wat oorbly – poësie in die melkweg
en onthou van nyanga se kind
die glans van die skulp
in die branders se pulp