Konstantinos P. Kabaphes: vertaal in Afrikaans deur Cas Vos.
Wag vir die Barbare
Vir wie wag ons, gespanne in die forum?
Die barbare is op ons drumpel.
Waarom buig daar stilte oor die senaat?
Waarom sit senatore sonder raad?
Omdat die barbare vandag kom met luister.
Watter wette kan die senatore nou verduister?
As die barbare eers kom, is wetgewing hulle plig.
Waarom het ons keiser so vroeg opgestaan,
en waarom sit hy by die stad se hoofhek
op sy troon, waardig, kroon op sy kop?
Omdat die barbare vandag hulle intog maak
en die keiser wag om hulle leier te omhels.
Hy het ’n boekrol voorberei as geskenk,
beskryf met titels, indrukwekkende name.
Hoekom het ons twee konsuls en pretors uitgekom
en hulle geborduurde, hulle skarlaken togas gedra?
Hoekom die armbande met soveel kosbare edelstene,
en ringe wat glans met manjifieke smarag?
Hoekom dra hulle elegante wandelstokke
sierlik gekerf, omvou met silwer en goud?
Omdat die barbare vandag kom met luister
en sulke dinge die barbare verbyster.
Waarom kom geeërde orators nie soos altyd na vore
om woorde te weef en oor harte te sprei nie?
Omdat die barbare vandag in aantog is
en leë woorde die barbare koud laat.
Waarom die skielike rusteloosheid, hierdie verwarring?
(Hoe vol erns is mense se gesigte nie geplooi nie.)
Waarom is die strate so leeg en die pleine so kaal,
drentel almal huiswaarts vol verskiete gedagtes?
Omdat die nag alles gevlek het en die barbare nie gekom het nie.
En sommige wat lamvoet van die grens teruggekeer het, sê
daar is geen barbare meer nie.
En nou, waarheen vlug ons sonder die barbare?
Hulle was, daardie mense, ’n soort oplossing.
(c) Cas Vos / Oktober 2014 Vertaling deur Cas Vos van
Konstantinos P. Kabaphes se Periménontas tous Barbárous
Melanie, baie dankie vir jou opmerking. Ek dink ook aan J.M. Coetzee se Waiting for the Barbarians. Dis ‘n tydlose gedig. Vir toe en nou.
Baie dankie Cas. Hierdie gedig laat my altyd dink aan J.M. Coetzee se Waiting for the Barbarians.
Anthony, baie dankie. Sommige gedigte rimpel deur eeue op troebel water.
Absoluut ‘n gedig vir vandag! Dankie!!!