Hennie Nortjé. L’ Agulhas: Vrydag, 13 November 2015
L’ Agulhas: Vrydag, 13 November 2015
Soos met die vroegste vaarders
raak my kompas
hier aan die Kaap van naalde
ook vir ‘n oomblik deurmekaar,
want in die simmetrie
van strandkoolblare
lees ek nou in ou Arabies
gewyde verse. asof woordeliks
uit die Groot Boek aangehaal.
Maar dan meteens swiep
die witkruis-paddavreter,
skarrel man en muis verbete,
tot nogmaals ‘n verbeelde vrede
oor hierdie godverlate duine daal.
© Hennie Nortjé / 2015
