In beeld, vlugtig
In die afloop van ‘n bestemde dag
sal ons aan die planeet ontheg,
met vlerkgeklap in die laatson
verby die beurtsange
van lig en skaduwee aanbeweeg.
Soos swerfskulpe sal ons
in die ruim
die gesels van seë optel
en ons al wentelend
instem op die akkoorde
tussen sfere.
Ons sal asem word,
in somernagte
‘n sweem van wind,
en op die gevonde ritme
van lugstrome
mekaar vind en weer
in mekaar verloor
tot dit om ons lig word
soos die eerste dag.
© Zandra Bezuidenhout, 2020
Dis verskriklik mooi!