Zandra Bezuidenhout. In beeld, vlugtig

 

In beeld, vlugtig

 

In die afloop van ‘n bestemde dag

sal ons aan die planeet ontheg,

met vlerkgeklap in die laatson

verby die beurtsange

van lig en skaduwee aanbeweeg.

 

Soos swerfskulpe sal ons

in die ruim

die gesels van seë optel

en ons al wentelend

instem op die akkoorde

tussen sfere.

 

Ons sal asem word,

in somernagte

‘n sweem van wind,

en op die gevonde ritme

van lugstrome

mekaar vind en weer

in mekaar verloor

tot dit om ons lig word

soos die eerste dag.

 

 © Zandra Bezuidenhout, 2020

 

Bookmark and Share

Een Kommentaar op “Zandra Bezuidenhout. In beeld, vlugtig”

  1. Bester Meyer :

    Dis verskriklik mooi!

Los kommentaar

 

*

  •