Wenner van AVBOB 2020-Poësieprys (Afrikaans)

 

Maretha Maartens is die wenner van die 3e jaarlikse AVBOB 2020-Poësieprys: Afrikaans

 

 

 

Peperboom

“Geil en goed gegroei om só verwoes te word.”

Die lem vibreer deur bas en duramen

en jy, suurstofsoekend voor die venster,

kreun oor die peperboomstam wat grond toe stort.

 

Ma, jy was tog lewenslank lembestand

onknakbaar sterk en doodweerstandig

– ons lowerryke peperboom

huisboom, groen baken van ons binneland.

 

Ons het ons honger en nood voor jou oopgegooi

en die bessies wat jy strooi soos die sysies

streepkoppies en rooirugsaadvreters opgepik.

Weet jy, Ma, daardie bessies was genesend rooi.

 

“Aan ’n peperboom,” het jy gesê, “kleef daar ’n eenvoudigheid

wat aan saadvretervoëls en koeltesoekers bied wat hulle soek.”

Toe jy gekreun het omdat die stam dwarsdeur sy pithout knak

– ou huilboom, huisboom in jou gewaande onaansienlikheid –

 

moes ek gesê het: “Die boomsaer dink hy vát jou, Ma,

maar die takke uit jou stam sal jou peperbessies dra.”

 

Bookmark and Share

3 Kommentare op “Wenner van AVBOB 2020-Poësieprys (Afrikaans)”

  1. Rika du Plessis :

    Dis ‘n roerende huldeblyk aan jou ma en ‘n baie nederige boom, Maretha. Geluk met jou toekenning.

  2. Joan Hambidge :

    ‘n Aangrypende en sober gedig. Baie geluk.

  3. Marlise :

    Baie geluk, Maretha! HIerdie gedig is beslis ‘n wenner. Dis ‘n pragtige, sober vers – die metafoor met die peperboom so goed gekies. Ek het skielik gewonder met watter boom sou ek my eie ma mee kon vergelyk. Toe besluit dit kan slegs ‘n ou Waterbergse maroelaboom wees! 🙂

Los kommentaar

 

*

  •